Foto galerija: https://we.tl/b-7y9oxCtyih

Mlada reprezentacija Crne Gore, zauzela je četvrto mjesto na Balkanskom ekipnom prvenstvu koje je prethodnih dana igrano u poznatom skijalištu Popova Šapka u Sjevernoj Makedoniji. 

Naši mladi igrači mogli su do medalje međutim u poslednjem kolu, umjesto potrebne pobjede protiv reprezentacije domaćina, naša ekipa je odigrala neriješeno pa su bronzane medalje pripale domaćinima.

Za našu ekipu nastupali su: Milo Pobor, Savo Vujović, Peko Đurović, Mateja Popović i Mihailo Pušara. Selektor je bio Boro Miljanić. 

Što se tiče pojedinačnih rezultata, prijatno iznenađenje predstavlja rezultat mladog Mihaila Pušare, koji je na najbolji način iskoristio ukazano povjerenje i jedini u našoj ekipi bio neporažen, ostvarivši jednu pobjedu i dva remija u duelima sa bolje rejtingovanim igračima. 

Naša druga ekipa, sačinjena od mladih igrača iz Bara, zauzela je osmo mjesto. Za drugu ekipu nastupali su: Danilo i Ines Đenđinović, Andrej Račić i Luka Novaković. Mlada barska ekipa stekla je veliko iskustvo za budućnost.

Prvo mjesto zauzela je ekipa Grčke, drugo mjesto pripalo je Sloveniji, dok su bronzana odličja, kako je prethodno navedeno, pripala domaćinima. 

Sjajan završetak godine za Balkansku šahovsku federaciju, a Šahovska federacija Makedonije bila je sjajan domaćin i organizator takmičenja. Uporedo sa takmičenjem, dogovorene su buduće aktivnosti u radu Balkanske federacije, čije se ponovno pokretanje pokazalo kao pravi potez. 

Nadamo se da će naši mladi igrači nastaviti sa šahovskim napredovanjem i da ćemo u budućnosti ostati konkurenti za najbolji plasman.